ସୋରଡ଼ା ତାଲୁକ ଆଇନ ସେବା କମିଟି (TLSC) ପକ୍ଷରୁ ଆଜି ଆନ୍ତର୍ଜାତୀୟ ଶ୍ରମିକ ଦିବସ ଉତ୍ସାହର ସହ ପାଳନ କରାଯାଇଥିଲା। ଏହି ଅବସରରେ ବିଭିନ୍ନ କ୍ଷେତ୍ରର ଶ୍ରମିକମାନେ ଉପସ୍ଥିତ ରହି ସଭାକୁ ଗୌରବାନ୍ବିତ କରିଥିଲେ। କାର୍ଯ୍ୟକ୍ରମରେ ମୁଖ୍ୟ ଅତିଥି ଭାବେ ବରିଷ୍ଠ ଦେୱାନୀ ବିଚାରପତି ତଥା ତାଲୁକ ଆଇନ ସେବା କମିଟିର ଅଧ୍ୟକ୍ଷ ଶ୍ରୀ ଜନ୍ମେଜୟ ଦାସ ଯୋଗଦେଇ ଶ୍ରମିକମାନଙ୍କ ଅଧିକାର ସୁରକ୍ଷା ଓ ଆଇନ ସଚେତନତାର ଆବଶ୍ୟକତା ବିଷୟରେ ଉଦବୋଧନ ଦେଇଥିଲେ। ସେ କହିଥିଲେ, “ଶ୍ରମିକଙ୍କ ପାଇଁ ଗଢ଼ିଉଠେ ଦେଶର ଉନ୍ନତି, ତାଙ୍କ ଅଧିକାର ସୁରକ୍ଷା ହେଉଛି ଆମ ସମସ୍ତଙ୍କ କର୍ତ୍ତବ୍ୟ।” ମୁଖ୍ୟ ବକ୍ତା ଭାବେ ପ୍ରଥମ ଶ୍ରେଣୀ ବିଚାର ବିଭାଗୀୟ ବିଚାରପତି ଶ୍ରୀ ସ୍ତିତପ୍ରଜ୍ଞ ବିଶ୍ୱାଳ ଶ୍ରମ ଆଇନର ବିଭିନ୍ନ ନିୟମ ଓ ଶ୍ରମିକମାନଙ୍କ ପାଇଁ ଉପଲବ୍ଧ ଆଇନ ସହାୟତା ବିଷୟରେ ମନୋହର ଭାବରେ ଆଲୋଚନା କରିଥିଲେ। ସେ ଉଲ୍ଲେଖ କରିଥିଲେ, “ଆଇନ ହେଉଛି ଏକ ଶକ୍ତି ଯାହାକି ଶ୍ରମିକଙ୍କୁ ନ୍ୟାୟ ପାଇବାରେ ସହାୟତା କରେ।”

ଏହି ଅବସରରେ ସୋରଡ଼ା ଆଇନଜିବୀ ସଂଘର ସଭାପତି ଶ୍ରୀ ଜିତେନ୍ଦ୍ର କୁମାର ଧଳ ଶ୍ରମିକଙ୍କ ସମ୍ମାନ ଓ ସୁରକ୍ଷା ପାଇଁ ସମାଜର ସାମୁହିକ ଦାୟିତ୍ୱ ବିଷୟରେ କଥା କହିଥିଲେ। ଯୁଗ୍ମ ସମ୍ପାଦକ ଶ୍ରୀ ପ୍ରିୟରଞ୍ଜନ ପାଢ଼ୀ ତାଙ୍କ ଉଦବୋଧନ ରେ ନିର୍ମାଣ ଶ୍ରମିକଙ୍କ ସାମାଜିକ ସୁରକ୍ଷା କଥା ବିସ୍ତୃତ ଭାବେ ଆଲୋକପାତ କରିଥିଲେ।
କାର୍ଯ୍ୟକ୍ରମଟିକୁ ବରିଷ୍ଠ ଆଇନଜୀବୀ ଶ୍ରୀ ପ୍ରଭାତ କୁମାର ପାଢ଼ୀ ସୁନ୍ଦର ଭାବେ କବିତା ଆବୃତ୍ତି ମାଧ୍ୟମରେ ଶ୍ରମିକମାନଙ୍କ ଆଇନ ସଚେତନତା ବୃଦ୍ଧି ଓ ସମାଜରେ ସମାନ ଅଧିକାର ସଂଚାଳନା ପ୍ରତି ଗୁରୁତ୍ୱାରୋପ କରିଥିଲେ। “ଶ୍ରମ ହେଉଛି ସମ୍ମାନ, ଏଥିରେ ରହିଛି ଜୀବନର ପରିଚୟ।”।“ଯେଉଁଠି ଶ୍ରମିକର ମୂଲ୍ୟ ଅଛି, ସେଠି ଉନ୍ନତିର ଆଲୋକ ରହିଛି।” ସଭାରେ ଏହି ବାର୍ତ୍ତା ସର୍ବ ସମ୍ମତ ଭାବେ ମତ ପ୍ରକାଶ ପାଇଥିଲା। ସମାପ୍ତିରେ, ଉପସ୍ଥିତ ଶ୍ରମିକମାନଙ୍କୁ ଆଇନ ସହାୟତା ବିଷୟରେ ସଚେତନ କରାଯାଇ ତାଙ୍କ ଅଧିକାର ସୁରକ୍ଷା ପାଇଁ ସମସ୍ତଙ୍କୁ ଏକତ୍ର ହୋଇ କାମ କରିବାକୁ ଆହ୍ୱାନ କରାଯାଇଥିଲା। ସଭାରେ ସମସ୍ତ ଓକିଲ ଓ ଅଦାଲତର କର୍ମଚାରୀମାନେ ସକ୍ରିୟ ଭାବେ ଉପସ୍ଥିତ ରହି କାର୍ଯ୍ୟକ୍ରମକୁ ସଫଳ କରିଥିଲେ। ଶ୍ରମିକମାନଙ୍କ ସହ ଆଇନଜୀବୀ ଓ ନ୍ୟାୟିକ ପରିବାରର ଏହି ସମ୍ମିଳନ ସଭାକୁ ଅଧିକ ଗମ୍ଭୀର ଓ ଅର୍ଥପୂର୍ଣ୍ଣ କରିଥିଲା। ଶେଷରେ, ସରକାରୀ ଓକିଲ ଶ୍ରୀ ଭଗବାନ ମୁନି ସମସ୍ତ ଅତିଥି ଓ ଉପସ୍ଥିତ ଶ୍ରମିକମାନଙ୍କୁ ଧନ୍ୟବାଦ ଜଣାଇ କାର୍ଯ୍ୟକ୍ରମଟି ସୁସଂଗଠିତ ଓ ସୁସ୍ଥ ଭାବରେ ସମାପ୍ତ ହୋଇଥିଲା।
“ଶ୍ରମିକଙ୍କ ହସରେ ରହିଛି ଦେଶର ଭବିଷ୍ୟତ,
ତାଙ୍କ ସମ୍ମାନରେ ରହିଛି ସମାଜର ସତ୍ୟ ସୌନ୍ଦର୍ଯ୍ୟ।”