ନୂଆଦିଲ୍ଲୀ: ନୂଆଦିଲ୍ଲୀ ଗସ୍ତ ଅବସରରେ ଲୋକପ୍ରିୟ ଯୁବନେତା ତଥା ଭାରତୀୟ ଜନତା ଯୁବମୋର୍ଚ୍ଚା (ବିଜେୱାଇଏମ୍) ଓଡ଼ିଶାର ସୋସିଆଲ୍ ମିଡିଆ କୋ-ଇନ୍ଚାର୍ଜ ଶୁଭ୍ରଜିତ ଦାଶ ମାନ୍ୟବର କେନ୍ଦ୍ର ଶିକ୍ଷା, ଦକ୍ଷତା ବିକାଶ ଓ ଉଦ୍ୟମିତା ମନ୍ତ୍ରୀ ଶ୍ରୀ ଧର୍ମେନ୍ଦ୍ର ପ୍ରଧାନଙ୍କୁ ତାଙ୍କ ନୂଆଦିଲ୍ଲୀସ୍ଥିତ ବାସଭବନରେ ସୌଜନ୍ୟମୂଳକ ସାକ୍ଷାତ କରିଛନ୍ତି। ଏହି ସାକ୍ଷାତକାର ଏକ ଆତ୍ମୀୟ ଏବଂ ସକାରାତ୍ମକ ପରିବେଶରେ ସମ୍ପନ୍ନ ହୋଇଥିଲା।
ଏହି ଅବସରରେ ଓଡ଼ିଶାର ଶିକ୍ଷା ବ୍ୟବସ୍ଥାର ସାମଗ୍ରିକ ବିକାଶ, ଜାତୀୟ ଶିକ୍ଷା ନୀତି (NEP-2020)ର ପ୍ରଭାବଶାଳୀ କାର୍ଯ୍ୟକାରିତା, ଉଚ୍ଚଶିକ୍ଷାର ଗୁଣାତ୍ମକ ଉନ୍ନତି, ଗବେଷଣା କ୍ଷେତ୍ରରେ ଯୁବମାନଙ୍କ ସହଭାଗିତା, ଛାତ୍ରଛାତ୍ରୀଙ୍କ ଦକ୍ଷତା ବିକାଶ, ରୋଜଗାରମୁଖୀ ଶିକ୍ଷା, ଷ୍ଟାର୍ଟଅପ୍ ଏବଂ ଉଦ୍ୟମିତାକୁ ପ୍ରୋତ୍ସାହନ ଭଳି ଅନେକ ଗୁରୁତ୍ୱପୂର୍ଣ୍ଣ ବିଷୟ ଉପରେ ବିସ୍ତୃତ ଆଲୋଚନା ହୋଇଥିଲା।
ଶ୍ରୀ ଦାଶ ଛାତ୍ରଛାତ୍ରୀମାନେ ବର୍ତ୍ତମାନ ସମୟରେ ସମ୍ମୁଖୀନ ହେଉଥିବା ବିଭିନ୍ନ ସମସ୍ୟା, ଉଚ୍ଚଶିକ୍ଷାର ସୁଯୋଗ, ଡିଜିଟାଲ୍ ଶିକ୍ଷାର ବିସ୍ତାର, ଗ୍ରାମାଞ୍ଚଳର ଶିକ୍ଷାର୍ଥୀଙ୍କ ପାଇଁ ସୁବିଧା ବୃଦ୍ଧି ଏବଂ ଯୁବପିଢ଼ିଙ୍କୁ ଆତ୍ମନିର୍ଭରଶୀଳ କରିବା ଦିଗରେ କେନ୍ଦ୍ର ସରକାରଙ୍କ ବିଭିନ୍ନ ପଦକ୍ଷେପ ସମ୍ପର୍କରେ ମଧ୍ୟ ନିଜର ମତାମତ ଉପସ୍ଥାପନ କରିଥିଲେ। ମାନ୍ୟବର ମନ୍ତ୍ରୀ ମଧ୍ୟ ଏହି ସମସ୍ତ ପ୍ରସଙ୍ଗକୁ ଗୁରୁତ୍ୱର ସହ ଶୁଣି ଯୁବସମାଜର ସକ୍ରିୟ ଭୂମିକା ଉପରେ ନିଜର ମତ ରଖିଥିଲେ।
ଆଲୋଚନା ସମୟରେ ଓଡ଼ିଶାର ସାମଗ୍ରିକ ବିକାଶ, ଶିକ୍ଷା ଭିତ୍ତିଭୂମିର ସୁଦୃଢ଼ୀକରଣ, ଦକ୍ଷତା ବିକାଶ କେନ୍ଦ୍ରର ବିସ୍ତାର, ଯୁବମାନଙ୍କ ପାଇଁ ନୂତନ ସୁଯୋଗ ସୃଷ୍ଟି ଏବଂ ବିଭିନ୍ନ ଜନହିତକର ଯୋଜନାର ସଫଳ ରୂପାୟନ ସମ୍ପର୍କରେ ମଧ୍ୟ ସକାରାତ୍ମକ ଆଲୋଚନା ହୋଇଥିଲା। ଯୁବଶକ୍ତି ହେଉଛି ରାଷ୍ଟ୍ର ଗଠନର ମୂଳ ଆଧାର ବୋଲି ଉଭୟ ମତ ପ୍ରକାଶ କରିଥିଲେ ଏବଂ ସମାଜର ସର୍ବାଙ୍ଗୀଣ ବିକାଶରେ ଯୁବପିଢ଼ିର ଭୂମିକାକୁ ଅଧିକ ସୁଦୃଢ଼ କରିବା ଉପରେ ଗୁରୁତ୍ୱାରୋପ କରାଯାଇଥିଲା।
ସାକ୍ଷାତ ପରେ ଶୁଭ୍ରଜିତ ଦାଶ କହିଥିଲେ ଯେ, ମାନ୍ୟବର କେନ୍ଦ୍ରମନ୍ତ୍ରୀ ଶ୍ରୀ ଧର୍ମେନ୍ଦ୍ର ପ୍ରଧାନଙ୍କ ଦୂରଦର୍ଶୀ ନେତୃତ୍ୱ, ସରଳତା, କର୍ମନିଷ୍ଠା ଏବଂ ଯୁବସମାଜ ପ୍ରତି ତାଙ୍କର ସମର୍ପିତ ଭାବନା ସଦାସର୍ବଦା ପ୍ରେରଣାଦାୟକ। ତାଙ୍କ ମାର୍ଗଦର୍ଶନ ଓ ଆଶୀର୍ବାଦ ଓଡ଼ିଶାର ଯୁବପିଢ଼ିଙ୍କୁ ନୂତନ ଉତ୍ସାହ, ଆତ୍ମବିଶ୍ୱାସ ଏବଂ ରାଷ୍ଟ୍ର ଗଠନରେ ସକ୍ରିୟ ଭାବେ ସାମିଲ ହେବା ପାଇଁ ଅନୁପ୍ରାଣିତ କରିବ।
ସେ ଆହୁରି କହିଥିଲେ ଯେ, ଓଡ଼ିଶାର ଯୁବସମାଜ, ଛାତ୍ରଛାତ୍ରୀ ଏବଂ ଗବେଷକମାନଙ୍କ ସ୍ୱାର୍ଥ ସହ ଜଡ଼ିତ ବିଭିନ୍ନ ବିଷୟକୁ ଆଗାମୀ ଦିନରେ ମଧ୍ୟ ପ୍ରାଥମିକତାର ସହ ଉପସ୍ଥାପନ କରିବା ସହ ଜନସେବା ଓ ସମାଜକଲ୍ୟାଣ ପାଇଁ ନିରନ୍ତର କାର୍ଯ୍ୟ କରିବେ। ଏହି ସୌଜନ୍ୟମୂଳକ ସାକ୍ଷାତ ଓଡ଼ିଶାର ଶିକ୍ଷା, ଯୁବଶକ୍ତି ଏବଂ ବିକାଶମୂଳକ ପ୍ରସଙ୍ଗରେ ଏକ ସକାରାତ୍ମକ ବାର୍ତ୍ତା ପ୍ରଦାନ କରିଛି।
