ଗଞ୍ଜାମ ଜିଲ୍ଲା ଦିଗପହଣ୍ଡି ବ୍ଳକ ଅନ୍ତର୍ଗତ କଇଠଖଣ୍ଡି ପଞ୍ଚାୟତ ଅନ୍ତର୍ଗତ ତଲାସିଙ୍ଗି ଗ୍ରାମରେ ଏକ ଦୁର୍ଭାଗ୍ୟଜନକ ଘଟଣା ଦେଖିବାକୁ ମିଳିଛି । ଘୋଡାହଡ ନଦୀ ଗର୍ଭରେ ବୁଡି ଯାଉଥିବା ୧୦ ବର୍ଷର ପୁଅର ଜୀବନ ବଞ୍ଚାଇ ନିଜେ ଜୀବନ ହାରିଛନି ପିତା ଅରୁଣ ପଣ୍ଡା । ଖବରନୁଯାୟୀ , ମୃତ ଅରୁଣଙ୍କ ଘର ଦିଗପହଣ୍ଡି ବ୍ଳକ ନିମଖଣ୍ଡିପେଣ୍ଠ ପଞ୍ଚାୟତରେ ହୋଇଥିବା ବେଳେ ସେ ବର୍ତ୍ତମାନ ରାଉଲକେଲାରେ କୈାଣସି କାମରେ ନିୟୋଜିତ ରହିଥିଲେ । ତେବେ ପରିବାର ସହ ସେଠାରେ ରହି ଆସୁଥିବା ବେଳେ ସମ୍ପର୍କୀୟ ଭୋଜି ନିମନ୍ତେ ସେ ମଙ୍ଗଳବାର ଦିନ ସପରିବାର ସହ ବ୍ରହ୍ମପୁରରେ ଏକ ଭୋଜି କାର୍ଯ୍ୟକ୍ରମରେ ଯୋଗ ଦେଇ ଶଶୁର ଘର ତଲାସିଙ୍ଗିରେ ପହଞ୍ଚିଥିଲେ । ତେବେ ଗାଧୋଇବା ପାଇଁ ଗ୍ରାମ ଦେଇ ବହି ଯାଉଥିବା ଘୋଡାହଡ ନଦୀକୁ ବାପା ଓ ପୁଅ ମିଶି ୨ ଘଣ୍ଟା ସମୟରେ ଯାଇଥିଲେ । ତେବେ ଗାଧୋଇବା ସମୟରେ ଅସାବଧାନତା ଯୋଗୁଁ ପୁଅ ପାଣିରେ ବୁଡି ଯାଉଥିବା ଦେଖି ପାଣି ଗର୍ଭକୁ ଡେଇଁ ପଡ଼ିଥିଲେ ବାପା ଅରୁଣ । ପୁଅକୁ ପାଣି ଭିତରୁ ଠେଲି ଜୀବନ ସିନା ବଞ୍ଚାଇ ଦେଲେ ହେଲେ ନିଜେ ବୁଡି ଯାଇଥିଲେ । ଏନେଇ ପୁଅ ଧାଇଁ ଆସି ପରିବାର ଲୋକଙ୍କୁ ଜଣାଇବା ପରେ ଗ୍ରାମବାସୀ ଯାଇ ବହୁ ଖୋଜାଖୋଜି କରିଥିଲେ । ଏହାପରେ ସ୍ଥାନୀୟ ସରପଞ୍ଚ ମନୋରଞ୍ଜନ ଗୈାଡ ଦିଗପହଣ୍ଡି ଅଗ୍ନିଶମ ବିଭାଗ କାର୍ଯ୍ୟାଳୟକୁ ଜଣାଇଥିଲେ । ଖବରପାଇ ଅଗ୍ନିଶମ ବିଭାଗ କର୍ମଚାରୀ ମାନେ ଘଟଣାସ୍ଥଳରେ ପହଞ୍ଚି ଦୀର୍ଘ ୨ ଘଣ୍ଟାର ଅକ୍ଳାନ୍ତ ପରିଶ୍ରମ ପରେ ନଦୀଗଣ୍ଡରୁ ଅରୁଣଙ୍କୁ ଉଦ୍ଧାର କରି ଦିଗପହଣ୍ଡି ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରରେ ଭର୍ତ୍ତି କରିଥିଲେ । ତେବେ ସେଠାରେ ଉପସ୍ଥିତ ଡାକ୍ତର ମୃତ ଘୋଷଣା କରିଥିଲେ । ( ଦିଗପହଣ୍ଡି ରୁ କିରଣ କୁମାର ବେହେରା)